លក់ឡានមិនគ្រប់ ឥឡូវមហាសេដ្ឋីពិភពលោក ដែលត្រូវជាស្ថាបនិកក្រុមហ៊ុនរថយន្ដអគ្គិសនីល្បី Tesla ស្ថាបនិកក្រុមហ៊ុនផ្កាយរណបធំ Starlink និងថ្មីៗ ជាម្ចាស់ភាគហ៊ុនធំរបស់បណ្ដាញសង្គម Twitter ផងនោះ លោក Elon Musk បានប្រកាសបើកមុខបរបន្ថែម ដោយ លក់ទឹកអប់ ម្ដង ដែលធ្វើឲ្យមានការភ្ញាក់ផ្អើលពីអ្នកគាំទ្រគ្រប់គ្នា។ 

តាមការឲ្យដឹងពីសារព័ត៌មាន Carscoops បានចុះផ្សាយថា ទឹកអប់ របស់ Elon Musk នេះ មានម៉ាកសញ្ញា ឈ្មោះថា “Burnt Hair” (សក់ឆេះ) ស្ថិតក្រោមការគ្រប់គ្រងពីក្រុមហ៊ុនបុត្រសម្ព័ន្ធលក់របស់ប្លែកៗរបស់លោកឈ្មោះថា Boring Company ហើយបើនិយាយពីភិនភាគរបស់ទឹកអប់វិញ តាមការឲ្យដឹងពីលោក Elon Musk ផ្ទាល់ ថា វាជាប្រភេទ “Omnigender product” មានន័យថា ប្រើបានសម្រាប់បុរស និងស្ដ្រី ដែលត្រូវបានវេចខ្ចប់ក្នុង ដបកែវពណ៌ក្រហម យ៉ាងប្រណិត ជាមួយនឹងតម្លៃលក់ចេញ ១០០ ដុល្លារក្នុងមួយដប។ 

  បើយោងតាមសារបង្ហោះក្នុងគណនីបណ្ដាញសង្គម Twitter ផ្លូវការរបស់លោកផ្ទាល់ (មើលតែ Bio គាត់ក៏ដាក់ មុខរបរអ្នកលក់ទឹកអប់ដែរ) បានឲ្យដឹងថា ក្រោយលោកប្រកាសចេញលក់ភ្លាម ត្រឹមតែប៉ុន្មានម៉ោងប៉ុណ្ណោះ ទឹកអប់ “Burnt Hair” នេះបានទទួលការកម្មង់ទិញ រហូតទៅដល់ ២០ ០០០ ដបឯណោះ ជួយឲ្យ Boring Company បានចំណូល ២ លានដុល្លារ យ៉ាងធូរ ដោយផលិតផលនឹងត្រូវខ្ចប់ ហើយដឹកជញ្ជូនឲ្យដល់ដៃអតិថិជន ក្នុងរង្ចង់ឆមាសទី ១ ឆ្នាំ ២០២៣។   

គួរបញ្ជាក់ថា នេះមិនមែនជាលើកទីមួយទេ ដែលមហាសេដ្ឋីរូបនេះ លក់របស់ប្លែកៗក្រៅពីឡានអគ្គិសនី ដោយកាលពីពាក់កណ្ដាលឆ្នាំ ២០២០ កន្លងទៅ លោកក៏ធ្លាប់បានចេញលក់ខោខ្លីសាច់សាទីនពណ៌ក្រហម Tesla  តម្លៃ មួយ ៦៩ដុល្លារ ដាក់លក់លើវេបសាយផ្លូវការរបស់ក្រុមហ៊ុនផ្ទាល់, ឆ្នាំ ២០១៨ ចេញលក់ស្រា Tesla tequilla មួយដប ២៥០ដុល្លារ, លក់ឧបករណ៍បាញ់ភ្លើង (Flamesthrower) តម្លៃ មួយ ៥០០ដុល្លារ និង សូម្បីតែ ក្ដារជិះលើទឹករលក (surfboard) ដែលមានតម្លៃ មួយ ១៥០០ ដុល្លារ ផងដែរ ដូច្នេះ បន្ទាប់ពីទឹកអប់នេះ មានតែចាំមើល បន្ដទៀតថាតើលោក Musk នឹងមានអ្វីប្លែកយកមកលក់ទៀត។